click2ashti-आष्टी-पाटोदा-शिरुर मतदार संघातील प्रलंबित विकासकामांना वेग देण्यासाठी आमदार सुरेश धस यांनी केंद्रीय गृहमंत्री अमित शहा यांची दिल्ली येथे आज बुधवार (दि.३) रोजी भेट घेऊन सविस्तर चर्चा केली.
या भेटीदरम्यान रस्ते विकास,जलसिंचन प्रकल्प,आरोग्य व शिक्षण सुविधा उभारणी,नवीन औद्योगिक संधी निर्माण करणे यांसह ग्रामीण भागातील मूलभूत सुविधांसाठी केंद्र शासनाच्या अधिक मदतीची मागणी आमदार धस यांनी केली.मतदारसंघातील जनता विकासाची अपेक्षा ठेवून आहे.त्यासाठी आवश्यक निधी व प्रकल्पांचे तातडीने निर्गत करण्याची विनंती शहा यांच्याकडे करण्यात आली असल्याचे आमदार सुरेश धस यांनी सांगितले.अमित शहा यांनीही सकारात्मक पवित्रा दाखवत प्रस्तावित कामांचा पाठपुरावा करण्याचे आश्वासन दिल्याची माहिती मिळाली आहे.
उद्योग,रोजगार आणि कृषी विकासाचा महत्त्वाचा मुद्दा
युवकांना स्थिर रोजगाराच्या संधी मिळाव्यात म्हणून विशेष औद्योगिक क्षेत्र, कृषी प्रक्रिया उद्योग, दूध व पशुधन विकास प्रकल्प उभारण्याचा प्रस्ताव बैठकीत सादर करण्यात आला. डिजिटल साधनांच्या माध्यमातून ग्रामीण भागाची अर्थव्यवस्था सक्षम करण्याच्या योजनांवरही चर्चा झाली.
आरोग्य व शिक्षण सुविधांचा विस्तार
ग्रामीण रुग्णालये,मातृ-शिशु आरोग्य सेवा, उच्च शिक्षणाची उपलब्धता आणि कौशल्य विकास प्रशिक्षण संस्था यांना गती देण्याचे धस यांनी मांडले.’ग्रामीण भागातील विद्यार्थ्यांचे भविष्य उज्ज्वल करण्यासाठी केंद्राची साथ अत्यावश्यक आहे’असेही त्यांनी अधोरेखित केले.
शहा यांची सकारात्मक प्रतिक्रिया
मतदारसंघातील समस्या व संधी या दोन्ही मुद्द्यांकडे गांभीर्याने लक्ष देत, प्रस्तावित विकासकामांसाठी संबंधित मंत्रालयांशी त्वरित समन्वय साधण्याचे आश्वासन गृहमंत्री शहा यांनी आमदार धस यांना दिल्याची माहिती मिळाली आहे.
नागरिकांमध्ये आशावाद
या भेटीमुळे मतदारसंघातील मोठे प्रलंबित प्रकल्प मार्गी लागतील आणि विकासाला नवी गती मिळेल असा विश्वास स्थानिकांमध्ये व्यक्त होत आहे.आमदार धस यांचे हे प्रयत्न सकारात्मक दिशेने वाटचाल करीत असल्याचे जनतेचे म्हणणे आहे.
