आष्टीला न्याय मिळाला;शंकर देशमुख यांची भाजपाच्या जिल्हाध्यक्षपदी वर्णी

आष्टी click2ashti-भाजपचे बीड जिल्हाध्यक्ष राजेंद्र मस्के यांनी अचानक राजीनामा देऊन राष्ट्रवादी काँग्रेस पक्षात प्रवेश केला होता. त्यानंतर या पदावर कोणाची वर्णी लागणार याकडे सर्वांचे लक्ष लागले होते.आज शनिवारी दुपारी भाजपाचे निष्ठावंत कार्यकर्ते म्हणून ओळखले जाणारे आष्टी तालुक्याचे भुमिपुत्र शंकर देशमुख यांची वर्णी लागली आहे.
दरम्यान शनिवारी दुपारी भाजपचे प्रदेशाध्यक्ष चंद्रशेखर बावनकुळे यांनी शंकर देशमुख यांना त्यांच्या नव्या जबाबदारीचे पत्र दिले. शंकर देशमुख हे भाजपचे विद्यमान सरचिटणीस आहेत.माजीमंत्री पंकजा मुंडे, प्रीतम मुंडे यांचे निकटवर्तीय व माजी आमदार भिमराव धोंडे यांचे स्विय सहाय्यक म्हणून देशमुख यांची ओळख आहे.
देशमुख यांची नेमकी ओळख का?
वडिलांपासून राष्ट्रीय स्वयंसेवक संघ, भाजपचा वारसा असणाऱ्या देशमुख कुटुंबातील शंकर देशमुख हे कारसेवक म्हणून बाबरी मस्जिद पतनाच्या वेळी आंदोलनात सक्रिय सहभागी होते.घरात भाजपचा वारसा असल्याने पक्षनिष्ठ म्हणून त्यांनी अनेकवेळा वेगवेगळ्या पदावर जबाबदारी पार पाडली आहे.बूथ पासून ते लोकसभेपर्यंत प्रत्येक निवडणुकीत पक्षाचं काम हिरीरीने करणारे म्हणून शंकर देशमुख यांची पक्षाच्या वरिष्ठ पातळीवर ओळख आहे.