click2ashti-तालुक्याची “कामधेनू” म्हणून ओळख असलेला कडा सहकारी साखर कारखाना सुरू करण्यासाठी युद्धपातळीवर काम सुरू असतानाच,कारखान्यातील कोट्यवधी रुपयांच्या मशिनरीची चोरी झाल्याचा धक्कादायक प्रकार समोर आला आहे.या संदर्भात लवकरच पोलिसांत गुन्हा दाखल करण्यात येणार असल्याची माहिती माजी आमदार भीमराव धोंडे यांनी दिली.
आष्टी येथील भगवान महाविद्यालयात बुधवारी (दि.१) आयोजित पत्रकार परिषदेत ते बोलत होते.यावेळी त्यांनी कारखान्याच्या उभारणीचा आढावा घेताना अनेक अडचणींवर मात करत प्रकल्प पुढे नेल्याचे स्पष्ट केले.धोंडे म्हणाले की,शेतकऱ्यांच्या हितासाठी व स्थानिक अर्थव्यवस्थेला चालना देण्यासाठी कडा सहकारी साखर कारखाना सुरू करण्याचा निर्णय घेतला. या प्रकल्पाच्या उभारणीदरम्यान आर्थिक,प्रशासकीय तसेच तांत्रिक अडचणींचा सामना करावा लागला. मात्र सर्व अडथळ्यांवर मात करत सध्या कारखान्याचे काम अंतिम टप्प्यात पोहोचले असून येत्या गाळप हंगामात कारखाना सुरू करण्याचा निर्धार त्यांनी व्यक्त केला.
कारखान्यामुळे परिसरातील ऊस उत्पादक शेतकऱ्यांना मोठा आधार मिळणार असून,वाहतूक,रोजगार आणि ancillary उद्योगांना चालना मिळणार आहे.स्थानिक युवकांसाठी रोजगाराच्या संधी निर्माण होणार असल्यामुळे हा प्रकल्प तालुक्याच्या विकासासाठी महत्त्वाचा मानला जात आहे.मात्र,या सकारात्मक घडामोडींमध्येच कारखान्यावर चोरीचा डल्ला पडल्याची गंभीर बाब उघड झाली आहे.धोंडे यांनी सांगितले की,अज्ञात चोरट्यांनी कारखान्यातील महागडी मशिनरी चोरून नेली असून,या चोरीची किंमत कोट्यवधी रुपयांमध्ये आहे.संबंधित संशयितांची नावेही उपलब्ध झाली असून,लवकरच पोलिसांकडे अधिकृत तक्रार दाखल करण्यात येणार आहे.या प्रकारामुळे कारखान्याच्या कामावर काही प्रमाणात परिणाम होण्याची शक्यता व्यक्त केली जात असली तरी,प्रकल्प नियोजित वेळेत पूर्ण करण्यासाठी प्रशासन व संबंधित यंत्रणा प्रयत्नशील असल्याचेही त्यांनी स्पष्ट केले.दरम्यान,या चोरीच्या घटनेमुळे परिसरात खळबळ उडाली असून,कारखान्याच्या सुरक्षेबाबत प्रश्नचिन्ह उपस्थित झाले आहे. शेतकरी व नागरिकांनी दोषींवर कठोर कारवाई करण्याची मागणी केली आहे.
कारखाना सुरू होणारच-धोंडे यांचा निर्धार
अनेक अडचणींना तोंड देऊनही कडा सहकारी साखर कारखाना सुरू करण्याचा निर्धार कायम असल्याचे सांगत, येणाऱ्या हंगामात गाळप सुरू करून शेतकऱ्यांच्या अपेक्षा पूर्ण केल्या जातील, असा विश्वासही माजी आ. धोंडे यांनी व्यक्त केला.
